Ozapft is! – Mei, mia sois recht sei.

Is scho wieda soweit?! Ja, freilich, ozapft is. Mei, des iss bei uns in Bayern oiwei, des is nix Bsondas. Drei Schläg hoda braucht, da Ude. Des konna hoid. Dassa an Schpatn saufa muas, gschiad eam recht, er kannt scho lang a süffigs Koitnberga auf da Wiesn ozapfa, wenn de Gwampadn unsam boarischn Prinzn net seit Jahr und Dag de Dia vor da Nosa zuaschperrn dadn.

Mia is des ois wuascht, i geh eh ned aufd Wiesn. Vui zvui Gschwerl, vui zvui Bsuffane. Friara is ma am Mittag zum Hendlesse aussiganga und am Ohmd hod ma si mitm Gschpusi ins Riesnrad ghockt und Minga vo ohm ogschaut und si am Schiasstand oblogt. Heitzdog spuid d Musi nimma so gmiatli, heid is Rambazamba ogsagt. Mia sois recht sei, i bleib dahoam. Oda i fahr auf Koitnberg auffi und ziag ma a gscheids Bier eini. Zum Woi, schwoabs obi!